Vetëm 6 fëmijë do të ulen për herë të parë në bankat shkollore të SHFK-së “Baftiar Banushi” në Zagraçan për vitin 2026-2027, shkollë që përfshin nxënësit e dy fshatrave, Zagraçanit dhe Shumit, njofton Struga Ekspres
Një numër që flet më shumë se çdo statistikë tjetër për realitetin e hidhur që po përjetojnë vendbanimet tona. Dikur oborret e shkollave gumëzhinin nga zërat e fëmijëve, ndërsa sot në klasën e parë do të ketë vetëm gjashtë nxënës.
Kjo rënie drastike lidhet drejtpërdrejt me emigrimin e vazhdueshëm të familjeve shqiptare drejt vendeve perëndimore. Në kërkim të një jete më të mirë, shumë familje po largohen, duke lënë pas shtëpi të mbyllura, rrugë më të qeta dhe shkolla me gjithnjë e më pak nxënës.
Vetëm 6 fëmijë në një shkollë që mbulon dy fshatra është një kambanë alarmi për të ardhmen e këtyre vendbanimeve. Nuk bëhet fjalë vetëm për numrin e nxënësve, por për zbrazjen graduale të fshatrave dhe humbjen e brezave që do të duhej të ndërtonin të ardhmen e tyre në vendlindje.
Ky është një lajm që prek dhe trishton, sepse pas çdo banke të zbrazët fshihet historia e një familjeje që ka zgjedhur ose është detyruar të kërkojë të ardhmen larg vendit të saj. Sot janë vetëm 6 fëmijë në klasën e parë. Një shifër e vogël, por me një mesazh shumë të madh për të gjithë.
(Struga Ekspres)
