Shtëpia e Bardhë është vënë nën alarm paraditen e së shtunës, pasi shumë afër saj u dëgjua zhurma e një shpërthimi dhe tym.
Shërbimi sekret më pas tha se autoritetet i ishin përgjigjur menjëherë zjarrit që kishte rënë dhe se po kontrollonin gjithashtu një automjet në afërsi të Shtëpisë së Bardhë.
Zëdhënësi Brian Leary tha se një karrocë e një shitësi ishte përfshirë nga zjarri rreth orës 10:00 të paradites . Ai tha se zjarrfikësit shkuan menjëherë aty dhe panë se ajo kishte marrë flakë.
Rreth të njëjtës orë, Leary shpjegoi se një qen bombë-nuhatës zbuloi diçka në një makinë në rrugën 16 dhe “Constitution Avenue”.
Automjeti u kontrollua nga shërbimi sekret dhe zyrtarë të tjerë.
Mes dy incidenteve nuk kishte asnjë lidhje, shpjegoi zëdhënësi Leary.Zhurmë e lartë u dëgjua në “South Lawn” të Shtëpisë së Bardhë pak çaste pasi shtypi dhe zyrtarët u mblodhën për udhëtimin e presidentit Barak Obama në Selma, Alabama.
Autokolona presidenciale u largua nga Shtëpia e Bardhë vetëm pas orës 11:00. (video)
