Një arritje e rëndësishme është shënuar për komunitetin shqiptar në Zvicër. Rixhil Agushi ka siguruar një vend në Këshillin Ekzekutiv të qytetit të Schlierenit (Stadtrat), duke u bërë shqiptarja e parë që arrin të jetë pjesë e këtij institucioni drejtues të qytetit.
Si përfaqësuese e Partisë Socialdemokrate (SP) dhe me një angazhim të gjatë në Parlamentin Komunal të Schlierenit, Agushi ka arritur të fitojë mbështetjen e qytetarëve për të ushtruar detyrën në qeverisjen e qytetit gjatë mandatit 2026–2030.
Me rrënjë familjare nga Tetova, në Maqedoninë e Veriut, por e lindur dhe e rritur në Schlieren, ajo përfaqëson një histori suksesi për diasporën shqiptare. Zgjedhja e saj shihet si një hap i rëndësishëm drejt forcimit të përfaqësimit të shqiptarëve në institucionet lokale zvicerane dhe si dëshmi e rolit gjithnjë në rritje të komunitetit shqiptar në jetën politike dhe shoqërore të vendit.
Ky sukses hap një faqe të re për shqiptarët në Schlieren dhe përbën një burim krenarie për gjithë diasporën shqiptare në Zvicër.
