Taravari: Koalicioni me BDI dhe AKI është i përkohshëm
Kryetari i Aleancës për Shqiptarët, Arben Taravari, në një intervistë për Telegrafi Maqedoni ka theksuar se koalicioni me BDI dhe Aleancën Kombëtare për Integrim (AKI) nuk është i përhershëm, por një projekt i përkohshëm i lidhur me një mision të qartë.
“Unë mendoj se projekti Aleanca Kombëtare nuk ka nevojë të ekzistojë në momentin që Maqedonia nis negociatat me Bashkimin Europian. Çdo parti aty e ka anëtarësinë e vet, vizionin dhe ideologjinë e vet. Ky është një bashkëpunim në një kohë të jashtëzakonshme”, ka deklaruar Taravari.
Ai sqaroi se qëllimi i këtij bashkëpunimi është kthimi i vendit në rrugën e duhur, veçanërisht drejt integrimit europian. “Mbi të gjitha është mision që ta kthejmë shtetin në rrugën e duhur, integrimin europian dhe fillimin e negociatave”, shtoi ai.
Taravari paralajmëroi se vonesat mund ta lënë Maqedoninë e Veriut në grupin e shteteve si Bosnja e Kosova, duke theksuar se vendi duhet të fillojë negociatat njëkohësisht me Shqipërinë dhe Malin e Zi.
