Kryeministri Dimitar Kovaçevski sot ka komentuar futjen e ASH-së në Qeveri, ku po diskutohet dhe bisedohet për zgjerimin e shumicës, ai tha se ende nuk ka diçka konkrete por mund të arrihet lehtë një marrëveshje.
“Thash që nuk kemi biseduar konkretisht për resorë dhe për marrjen e përgjegjësive në resorë të caktuara, por gjithsesi se bisedimet do të vazhdojnë dhe në qoftë se biem dakord komplet në këto parime themelore për të ardhmen e shtetit, në këtë nuk kam dyshim për shkak se Aleanca për Shqiptarët edhe në periudhën e kaluar ka treguar se ka mbështetur të gjitha vendimet që kishin të bëjnë për ardhmërinë evropiane të vendit. Mendoj se në të ardhmen, nëse bisedimet vazhdojnë me vullnet të mirë dhe në frymë pozitive si deri tani, mund të ndodh edhe zgjerimi i shumicës qeveritare”, tha mes tjerash Kovaçevski.
Kryeministri Dimitar Kovaçevski thotë se përgjigja e tij për mundësinë e futjes së Aleancës për Shqiptarët në Qeveri nuk dallon shumë nga ajo e kreut të integristëve Ali Ahmeti.
“Përgjigjen që e dha kryetari i BDI-së Ali Ahmeti nuk dallon shumë nga përgjigja që dhashë unë. Për shkak se edhe unë thash që me partinë Aleanca për Shqiptarët, posaçërisht me u.d. kryetarin Arben Taravari edhe unë kam biseduar për ardhmërinë evropiane të vendit dhe të gjitha vendimet që duhet të merren, gjithashtu thash që koalicioni ynë qeveritar është i hapur për të gjitha partitë politike që e ndajnë këtë vizion”, tha mes tjerash Kovaçevski.
