Tre të pandehur në çështjen e falsifikimit të lejeve të drejtimit kanë pranuar fajësinë dhe kanë marrë dënime me burg në procedurë të shkurtuar. Të pandehurës së parë, punonjëse e Ministrisë së Punëve të Brendshme, i është dhënë dënimi me burg prej dy vjetësh e gjashtë muajsh, ndërsa të pandehurit e dytë dhe të tretë janë dënuar me një vit e tre muaj burg. Për të tre është vazhduar masa e paraburgimit, informuan në briefing në Gjykatën Themelore Penale Shkup.
Çështja ka të bëjë me futjen e paligjshme të kategorive në lejet e drejtimit, lëshimin dhe përdorimin e tyre. Nga gjykata sqarojnë se bëhet fjalë për propozim akuzues dhe, pasi nuk ka vlerësim, menjëherë është caktuar seanca. Tre persona janë të paarritshëm, ndërsa për tre që ishin në paraburgim dje është mbajtur seanca, në të cilën kanë pranuar fajësinë dhe u janë caktuar dënime me burg.
Prokuroria Themelore Publike Shkup më 19 shtator ka paraqitur propozim akuzues kundër gjashtë personave për vepër penale të vazhduar falsifikim dokumenti sipas nenit 378 paragrafi 3 në lidhje me paragrafin 1 të Kodit Penal.
E pandehura e parë, punonjëse në Ministrinë e Punëve të Brendshme si këshilltare e re për dokumente udhëtimi në Degën e Punëve Administrative në Shkup, në periudhën nga shtatori 2020 deri në gusht 2026, në disa raste ka përdorur kodet e saj zyrtare për të ndryshuar lejet e drejtimit duke futur kategori shtesë, thotë Prokuroria.
Pesë të pandehurit e tjerë janë shoferë të cilët, edhe pse nuk kishin dhënë provimin e drejtimit për kategoritë C dhe D, në marrëveshje me nëpunësen kanë paraqitur kërkesa për lëshimin e lejeve të drejtimit, në të cilat janë futur kategori për të cilat nuk i plotësonin kushtet ligjore.
Për tre të pandehur, të cilët janë të paarritshëm për organet e ndjekjes, është propozuar caktimi i paraburgimit pas gjetjes së tyre, ndërsa procedura kundër tyre të vazhdojë në mungesë. Në kuadër të të njëjtës çështje Prokuroria vazhdon me sigurimin e provave kundër 21 personave të tjerë të dyshuar se kanë qenë ndërmjetës ose përdorues të lejeve të falsifikuara të drejtimit, ndërsa hetimeja përfshin edhe abuzime të tjera të mundshme të lidhura me rastin.
