Qytetarët që udhëtojnë mes Shqipërisë dhe Maqedonisë së Veriut do të përfitojnë nga një procedurë më e shpejtë kufitare, pasi duke filluar nga muaji korrik do të aplikohet sistemi “One Stop”, i cili mundëson kalimin me vetëm një kontroll, shkruan Struga Ekspres.
Marrëveshja u nënshkrua nga ministri i Brendshëm i Shqipërisë, Besfort Lamallari, dhe homologu i tij nga Maqedonia e Veriut, Pançe Toshkovski, gjatë një ceremonie të zhvilluar në ambientet e Drejtorisë Vendore të Policisë në Dibër.
Modeli i ri synon të shmangë kontrollet e dyfishta, të shkurtojë kohën e pritjes në pikat kufitare dhe të rrisë bashkëpunimin mes autoriteteve policore dhe doganore të të dy vendeve.
Autoritetet maqedonase theksuan se i njëjti sistem është përdorur me sukses edhe në kufijtë me Kosovën dhe Serbinë, duke lehtësuar qarkullimin e njerëzve dhe mallrave.
Zbatimi i marrëveshjes do të nisë fillimisht në pikën kufitare të Qafë Thanës, ndërsa në fazën e dytë do të shtrihet edhe në pikën kufitare të Bllatës, në Dibër.
