Gazeta “Dnevnik” vlerëson se publikimi i përgjimeve nga lideri socialdemokrat Zoran Zaev ka për qëllim mbjelljen e frikës.
Gazeta thotë se kjo fushatë po mbështetet edhe nga SHBA, BE dhe Gjermania.
Në artikull, i cili i ngjan më shumë një komenti, gazeta pyet se cili është interesi publik i publikimit të bisedave private të politikanëve.
“Pas publikimit të regjistrimeve të para, është krijuar atmosfera e mbjelljes së frikës, në kuptimin se opozita ka për gjithsecilin materiale të cilat mund t’i publikojë. Mungesa e skrupujve shkon deri aty sa opozita mësohet se kërcënon me anë telefoni disa persona, në stilin: Te kemi edhe ty!”, shkruan gazeta.
Më pas, gazeta ndalet te deklaratat e ambasadave të huaja, duke thënë se ato inkurajojnë kreun e opozitës të bëjë çfarë të dojë me materialet që posedon.
“Ambasada e SHBA-së madje u caktoi për detyrë autoriteteve të vendit që të sqarojnë deklaratën e Prokurorisë, ku ajo paralajmëronte se publikimi i materialeve mund të jenë objekt i procedurës penale dhe se ndalohen të publikohen nga mediet”, shkruan gazeta maqedonase.
