Propozimet për ministra për plotësimin e vendeve vakante në Qeveri kanë mbërritur në Kuvend dhe se sot është paralajmëruar votimi i tyre.
Kryeministri Zoran Zaev bëri të qartë se ministri i ri i shëndetësisë pritet të jetë Venko Filipçe, një mjek specialist i propozuar nga LSDM, i cili ka kryer edhe postin e këshilltarit të kryeministrit në shëndetësi.
Zaev theksoi se ky post i takon atyre, sepse Arben Taravari i ASH-së në fillimin e parë të Qeverisë ishte emëruar në këtë detyrë si emër i mirënjohur në mjekësi dhe jo si kandidat i ASH-së.
Por kjo është mohuar nga Taravari i cili kritikoi kryeministrin Zaev, duke theksuar se ai ishte kandidat i ASH-së dhe se pretendimet e tij janë të pabaza.
Përveç ministrit të shëndetësisë, do të votohet edhe ministri pa resor që i takon partisë rom të Samka Ibraimovski, i cili kaloi si deputet si dhe në vend të tij vjen Aksel Ahmedovski dhe posti i zv/ministrit të arsimit, ku do të jetë Arbër Ademi.