Burime të gazetës Lajm nga Ministria për sistem politik dhe për marrëdhënie mes bashkësive kanë thënë se rreth 40 administratorë nuk janë paraqitur në këtë ministri për të pranuar vendimet e punës.
“Nga 1349 administratorë, vendimet i kanë marrë mbi 1300, kurse 37 ose 38 nuk janë paraqitur fare për të marë ato vendime. Në bazë të ligjit ‘lex specialis’ që përgatitëm për këtë rast, administratorët që nuk kanë ardhur t’i marin vendimet humbin të drejtën e vendit të punës”, theksuan këto burime për gazetën Lajm.
“Shumica prej këtyre që nuk erdhën të marin vendimet janë shqiptarë”, theksojnë ata.
Ndërkohë Rami Qerimi, nga kabineti i ministrit Grubi, deklaroi në emisionin “Rruga drejt…” në Alsat se një pjesë e administratorëve kanë marë vendimet por kanë kërkuar kohë shtesë për tu përcaktuar nëse do të pranojnë vendet e punës ku janë sistemuar ose jo.
Ata tani do të dërgohen në Ministrinë për shoqëri informatike, ku brenda gjashtë muajve do t’u përcaktohet sistemimi përfundimtar.
