Të mërkurën ka ndodhur një rrahje masovike mes 28 nxënësve në rrugën “Kosta Abrasheviq” në Çair të Shkupit. Sipas policisë, rrahja ka ndodhur mes dy grupeve të nxënësve, shkruan gazeta Lajm.
Në njërën anë kanë qenë 11 persona të moshës së mitur në moshë 13 deri 15 vjeçare (nëntë kanë qenë nga shkolla Liria kurse dy nga shkolla e mesme Arsenie Jovkov), kurse në anën tjetër 17 persona të moshës së mitur, poashtu në moshë 13-15 vjeçare, të gjithë nxënës të shkollës “7 Marsi”.
Në këtë rrahje dy grupet kanë shkëmbyer mes veti grushte dhe shqelma, kurse më pas janë gjuajtur edhe me gurë, prej të cilëve është dëmtuar një veturë private “Vento” me targa të Shkupit. Rrahja ka ndodhur si pasojë e mosdurimit dhe grindjes mes dy grupeve në rrjetet sociale. Ata janë takuar në një vend në bazë të marrëveshjes paraprake. Policia po merr masa për ndriçim të plotë të rastit.
