Pa një vlerësim real të gjendjes shëndetësore, nuk mund të konstatohet se vendi ka kushte për zgjedhje parlamentare. Drejtori i Institutit të Shëndetit Publik, Shaban Memeti i ftuar në “Programin 200” në Alsat thotë se si fillim duhet të shihet efekti i masave lehtësuese, që me pas të mund të vlerësohet organizimi i zgjedhjeve. Për momentin nuk duhet nxituar.
Është shumë herët të flasim pasi jemi në gjendje të jashtëzakonshme. Do të bëjmë vlerësim real, do t’i lehtësojmë masat, t’i shohim reaksionin e qytetarëve dhe publikut dhe me këtë ta dimë sa teste do të bëhen, sa pozitive, sa do të kemi në spitale dhe mbi gjitha IPSH e ndjek gjendjen shëndetësore, nuk merret politik. Ne do ta themi gjendjen shëndetësore dhe nuk është mirë të ngutemi- deklaroi Shaban Memeti, Drejtor i Institutit të Shëndetit Publik.
Memeti shton se vlerësimi i gjendjes për zgjedhje do të mund të bëhej dy javë pasi numri i të infektuarve të jetë nën 10.
Pa paragjykime se a do të kemi zgjedhje ose kur do të kemi, ne kur do të kemi raste poshtë 10 me teste pozitive prej një periudhe prej 2 javëve atëherë mund të themi se jemi në rrugë të mbarë. Fillimisht duhet filluar me relaksimin e masave. Çështja e zgjedhjeve është diçka tjetër, bëhet fjalë për problem publik- shtoi Shaban Memeti, Drejtor i Institutit të Shëndetit Publik.
Sipas Memetit organizimi i zgjedhjeve, angazhimi i vëzhguesve dhe komisionerëve në hapësira të ngushta bie në kundërshtim me masat e Qeverisë. Ditë më parë ministri i Shëndetësisë, Venko Filipçe deklaroi se vendimi nëse ka kushte për zgjedhje ose jo do të merret mbi bazën e raportit mbi gjendjen publike shëndetësore të dhënë nga Komisioni për sëmundje ngjitëse dhe infektive.
Adrian Kerimi
