Bilall Kasami i Lëvizjes BESA ka komentur edhe vendimin paraprak të Kryesisë Qendrore të Lëvizjes BESA që u mbajt në selinë në Shkup, dhe për të njëjtin thotë se është vendim ilegal, jashtë statusit të partisë.
Kasami gjithashtu thotë se edhe hyrja në selinë e Shkupit është bërë në mënyrë ilegale, siç thotë ai, sikurse u thyen edhe faqet zyrtare në Facebook.
“Këshilli Qendror ashtu siç u thirr zyrtarisht ka mbajtur mbledhje në Tetovë dhe i ka sjellë vendimet ashtu siç ka qenë me rend, ashtu siç parashihet më statusin e partisë”, tha Kasami për Portalb.
Se a do të thotë kjo se qëndrimi i tij në krye të BESA-s është sjellë në bazë të statusit, kurse vendimi i kryesisë qendrore në Shkup ka shkuar në kundërshtim me statusin, Kasami u shpreh kështu: “Ata me çdo veprim që e kanë bërë, kanë bërë shkelje të statusit dhe kanë dëmtuar Lëvizjes BESA. Ata kanë hyrë në mënyrë ilegale në selinë në Shkup ashtu siç e hakuan edhe faqen time personale dhe të Lëvizjes”.
Se a do të shkojë shkarkimi i tij nga Kryesia Qendrore e Shkupit në organet e drejtësisë, Kasami tha: “Ne nuk kemi çfarë të drejtohemi në organet e drejtësisë, sepse ne e kemi legalitetin e partisë. Sipas të gjitha normave statusore është mbajtur mbledhja në Tetovë, ashtu edhe u sollën vendimet që tashmë ju i keni”, tha Kasami.
Paraprakisht, nga e-maili zyrtar i Lëvizjes BESA arriti kumtesë, ku u tha se në Këshillin Qendror të BESA-s që u mbajt në Tetovë është vendosur që Bilall Kasami të mbetet lider i partisë deri në Kongresin e partisë që do të mbahet më 24 shkurt të 2018-s.
“Në mbledhjen e rregullt të Këshillit Qendror të Lëvizjes Besa e mbajtur në Tetovë u sollën këto vendime: për mbajtjen e Kongresit të Parë të Lëvizjes Besa më 24.02.2018, zgjedhja e komisionit për Organizimin e Kongresit dhe deri në mbajtjen e kongresit të parë të partisë, me partinë do vazhdojë të udhëheqë kryetari Bilall Kasami”, u tha në njoftimin paraprak të BESA-s.
Por kjo u kundërshtua nga Kryesia Qendrore e BESA-s, e cila në mbledhjen që e mbajti sot në Shkup në mënyrë unanime, me 64 vota, e shkarkoi nga posti i liderit, Bilall Kasamin, duke u arsyetuar “me shkelje të statusit dhe papërgjegjësi të rezultatit të zgjedhjeve lokale”.
