Mëngjesin e së enjtes (sot), në Hunzenschwil të Zvicrës është shkaktuar nja zjarr, në një ndërtesë banimi, me ç`rast një person është lënduar rëndë dhe një tjetër ka kaluar me lëndime të lehta. Zjarri ka shkaktuar dëme të mëdha materiale, ndërsa shkaku ende nuk dihet.
Mëngjesin e të enjtes të datës 15 mars 2018, pak para orës o7.30 është shkaktuar një tym i dendur, i cili ka qenë si pasojë e një zjarri në katin e sipërm të një ndërtese. Një dëshmitar i ngjarjes menjëherë e ka alarmuar njësinë zjarrfikëse, e cila ka ardhur me mobilizim të madh në vendngjarje, shkruan „Blick“, përcjellë Shtegu.com. Përderisa zjarrfikësit po e shuanin zjarrin nga jashtë, ekipi special ka hyrë brenda në ndërtesë dhe ka zbuluar origjinën e zjarrit. Zjarri është shuar shumë shpejt.
Në ndërtesën e prekur nga zjarri ka banuar një familje katëranëtarëshe. Përderisa bashkëshortja me fëmijët janë larguar në kohën e duhur, bashkëshorti fillimisht është zhdukur. Pak më vonë, zjarrfikësit e kanë gjetur ate pa vetëdije në banesën e djegur.
Bëhet fjalë për një shtetas 41-vjeçar kosovar, i cili ka pësuar djegie të rënda. Me një helikopter emergjent, ai është dërguar në spital. Edhe fqinjët e tjerë kanë arritur të shpëtojnë në kohën e duhur nga zjarri, por një banor është dashur të dërgohet për kontroll në spital, për shkak të problemeve me frymëmarrjen.
Zjarri e ka shkatërruar tërësisht banesën e fami8ljes kosovare, ndërsa edhe banesat e katit të njëjtë, nuk janë më të banueshme. Dëmet materiale ende nuk mund të përcaktohen saktësisht, shkaku mbetet i paqartë, ndërsa policia zvicerane i ka filluar hetimet e mëtutjeshme. (Shtegu.com)
