Një aksident ku gjeti vdekjen një 72- vjeçar ka ndodhur në aksin nacional Berat-Lushnje, në fshatin Polizhan.
Mësohet se 72-vjeçari,ka qenë duke qarkulluar me biçikletë kur është përplasur nga një makinë, që pasi e ka hedhur në shesh është larguar nga vendngjarja.
Bëhet e ditur se Idajet Çobo është gjetur i shtrirë në rrugë nga drejtuesit e makinave të tjera që kanë qarkulluar më pas, të cilët kanë njoftuar policinë. 72-vjeçari është transportuar me ambulancë drejt Spitalit Rajonal Berat por ka gjetur vdekjen gjatë rrugës.
Trupi i pajetë i viktimës Çobo është transportuar në Morgun e Spitalit Rajonal Berat, ku do ti nënshtrohet autopsisë mjeko-ligjore.
Efektivë të shumtë policie janë duke punuar për identifikimin dhe kapjen e autorit të aksidentit, duke kërkuar edhe kamerat e mundshme të bizneseve apo banesave në anë të rrugës, nëpërmjet të cilave të bëjnë të mundur edhe identifikimin e targave të mjetit që e ka goditur.
