Nga maji i 2017 deri në maj të këtij viti rreth 18 mijë të huaj kanë kërkuar shtetësi bullgare, por numri më i madh i aplikimeve janë nga qytetarë nga Maqedonia.
Kjo u bë e ditur sot nga ministrja e drejtësisë e Bullgarisë, Cecka Caçeva para Kuvendit bullgar.
Sipas saj, mbi 10 mijë veta janë nga Maqedonia dhe se ky numër është në rritje. Përveç Maqedonisë, numri i madh i aplikimeve janë nga Ukraina, Moldavia, Shqipëria dhe Serbia.
Ajo ka theksuar se mbi 895 aplikacione të tjera janë refuzuar , ndërsa 700 të tjera janë shqyrtuar për riaplikim për të përfituar shtetësinë bullgare, nga persona që kanë hequr dorë më parë nga ajo.
Ndërsa 354 bullgarë kanë hequr dorë plotësisht nga shtetësia bullgare. Përmes procedurës për biznes, shtetësinë e kanë përfituar 150 rusë, 59 ukrainas, 50 irakian, 37 armen, 34 sirianë dhe 5 afgan.
