Policia serbe ka arrestuar një shtetas të Maqedonisë së Veriut në afërsi të Pribojit, nën dyshimin se ka hyrë në Serbi si i angazhuar për kryerjen e një vrasjeje me porosi, njoftoi media serbe „Telegraf“, duke iu referuar burimeve policore.
Tani për tani nuk ka informacione zyrtare se kush duhej të ishte caku i likuidimit të planifikuar, ndërsa hetimi duhet t’i përcaktojë të gjitha rrethanat rreth rastit.
Sipas informacioneve që transmeton kjo media, i dyshuari dyshohet se paska qenë i regjistruar nga shërbimet e sigurisë si vrasës me pagesë i cili ka punuar për klanin Kavaç. Ai, sipas të njëjtave burime, më parë është lidhur edhe me tentativën për vrasjen e Marko Ljubiša Kan.
Këto pretendime hëpërhë nuk janë konfirmuar zyrtarisht nga Ministria e Punëve të Brendshme e Serbisë.
„Telegraf.rs“ raporton se për likuidimin e planifikuar, të dyshuarit dyshohet se i është paguar paraprakisht një sumë e konsiderueshme parash. Nuk bëhet e ditur se për çfarë shume bëhet fjalë.
Pas marrjes së njohurive operative se në zonën e Pribojit ndodhet një i dyshuar i rrezikshëm, policia ka angazhuar forca të përforcuara dhe ka bllokuar terrenin. Aksioni ka përfunduar me arrestimin e tij.
Hetimi duhet të tregojë se kush ishte caku i pretenduar, por edhe nëse i dyshuari pas hyrjes në Serbi ka pasur mbështetje logjistike. Po verifikohen lokacione të mundshme dhe persona që mund t’i kenë ndihmuar në përgatitjen e veprës penale të planifikuar.
Shtetasit të Maqedonisë së Veriut i është caktuar ndalimi policor prej 48 orësh, pas së cilës, sipas informacioneve të medias serbe, me kallëzim penal duhet të del para prokurorisë kompetente.
