Pas organizimit të suksesshëm të manifestimit madhështor promovues dhe realizimit të Ditës së Hapur, Gjimnazi “Dr. Ibrahim Temo” – Strugë po vazhdon aktivitetet e promovimit dhe informimit për semimaturantët dhe prindërit, me qëllim prezantimin e mundësive arsimore, profesionale dhe zhvillimore që ofron shkolla.
Si aktivitet vijues në kuadër të kësaj fushate promovuese, drejtoresha e shkollës Rajmonda Mamudi-Shei ishte e ftuar në emisionin e Radio Struga, ku përmes një interviste të plotë prezantoi vizionin e shkollës, drejtimet arsimore, sukseset e nxënësve, projektet e realizuara dhe perspektivat që i presin gjeneratat e reja.
Gjatë intervistës u theksua se Gjimnazi “Dr. Ibrahim Temo” vazhdon të mbetet një ndër institucionet më të rëndësishme arsimore në rajon, duke ofruar arsim cilësor, staf profesional dhe mundësi të shumta për zhvillimin akademik dhe personal të nxënësve.
Shkolla veçohet për:
-Arsim bashkëkohor dhe atraktiv për tregun e punës dhe studimet e mëtejshme
-Mjedis modern dhe mbështetës për nxënësit
-Aktivitete kulturore, artistike, sportive dhe shkencore
-Pjesëmarrje në projekte vendore dhe ndërkombëtare
-Bashkëpunim me institucione dhe organizata të ndryshme
-Përkushtim ndaj cilësisë, inovacionit dhe zhvillimit të vazhdueshëm
Pas interesimit të madh të treguar gjatë Ditës së Hapur, ku semimaturantët dhe prindërit patën mundësi të njihen nga afër me ambientet, fushat e studimit dhe aktivitetet e shkollës, promovimi po vazhdon edhe përmes paraqitjeve publike dhe mediave lokale.
Intervista e drejtoreshës në Radio Struga përfaqëson vazhdimësinë e përpjekjeve për të afruar shkollën me komunitetin dhe për t’i ndihmuar semimaturantët në zgjedhjen e duhur për të ardhmen e tyre.
Gjimnazi “Dr. Ibrahim Temo” mbetet sinonim i traditës, cilësisë dhe suksesit – zgjedhja e duhur për çdo semimaturant që synon një të ardhme të sigurt dhe të suksesshme.
🎙️ Intervista e plotë e drejtoreshës në Radio Struga mund të ndiqet në platformat zyrtare të shkollës.
