Sistemi i përmbarimit në Maqedoninë e Veriut vazhdon të prodhojë shpenzime joproporcionale për qytetarët. Rasti i fundit i denoncuar nga Konfederata e Sindikatave të Lira (KSOM) tregon se si një borxh minimal prej 50 denarësh për shërbime të parkingu, është fryrë deri në 15.000 denarë pas kalimit nëpër hallkat e sistemit juridik, përcjell INA.
Sipas kryetarit të KSOM-it, Marjan Ristevski, kjo rritje drastike vjen si pasojë e tarifave të akumuluara nga palët e përfshira në procesin e arkëtimit të detyrueshëm:
Shërbimet e avokatit: 6.000 denarë (angazhuar nga ndërmarrja publike).
Kostot e noterit: 4.000 denarë.
Tarifat e përmbarimit: Pjesa mbetur e borxhit total.
“Është absurde dhe e papranueshme që për një borxh fillestar prej 50 denarësh, qytetari të paguajë 15.000 denarë. Ky sistem nuk po shërben për drejtësi, por për rëndimin e buxhetit të qytetarëve,” deklaroi Ristevski.
Nga ana tjetër, Ministria e Drejtësisë mbron efikasitetin e sistemit aktual dhe propozon ndryshime ligjore që synojnë të saktësojnë paqartësitë ekzistuese dhe të përshpejtojnë qarkullimin e mjeteve në ekonomi. Megjithatë, për përfaqësuesit e sindikatave, ky Propozim-ligj nuk ofron zgjidhje për problemet thelbësore, por thjesht bën një “grim” të gjendjes aktuale pa prekur lidhjen mes avokatëve, noterëve dhe përmbaruesve. Kritika kryesore mbetet te fakti se ligji i ri dështon në vendosjen e një raporti të drejtë mes borxhit bazë dhe shpenzimeve të procedurës, duke e lënë qytetarin të pambrojtur ndaj tarifave që tejkalojnë qindra herë vlerën e vetë borxhit.(INA)
