Kasami: BDI bëri fushatë me Lube Boshkovskin, kundërkandidatit po ia ndërtoj rrugën
Kandidati për kryetar të komunës së Tetovës, Bilall Kasami gjatë debatit të sontëm në Kallxo.com me Jeta Xharrën, duke iu përgjigjur akuzave të kandidatit të AKI-së Bajram Rexhepi për bashkëpunim me VMRO-në, tha se “BDI-ja po e akuzon atë me mëkatet e veta”.
“Po më akuzojnë me mëkatet e tyre. Këta jo vetëm që qeverisën me VMRO-në për më shumë se 10 vjet, por edhe e sollën në tubim Lube Boshkovskin i cili dyshohet se ka vrarë shqiptarë në Luboten, fëmijë, gra, pleq”, ka thënë Kasami.
Ai tha se në mandatin e tij të parë jo vetëm që e ka përgjysmuar borxhin e trashëguar prej 24 milionë eurosh, por edhe ka ndërtuar rrugë dhe projekte të shumta, përfshirë edhe rrugën dhe shkollën në fshatin e kundërkandidatit, Bajram Rexhepi nga AKI.
“Edhe kundërkandidati im e di se sa është punuar në Tetovë. Edhe ai e di se unë po ja ndërtoj edhe rrugën për në fshatin Sellcë dhe shkollën në fshatin Sellcë që është fshati i tij”, ka thënë mes tjerash Kasami.
