Murtezani: Shqiptarët e dinë kush ishte në pushtet në kohën e Gruevskit dhe kush i mbajti ata nën presion
Ministri për Çështje Evropiane, Orhan Murtezani, ka folur në emisionin “360 shkallë”, ku ka komentuar zhvillimet politike dhe raportet e forcave politike shqiptare në Maqedoninë e Veriut.
Murtezani ka theksuar se shqiptarët e dinë mirë se kush ishte në pushtet gjatë periudhës kur vendi përballej me tensione dhe presione të mëdha ndaj shqiptarëve, duke aluduar në qeverisjen e BDI-së në kohën e ish-kryeministrit Nikola Gruevski.
“Shqiptarët e dinë se kush ishte në pushtet në kohën e Gruevskit, kur kishte shumë tensione dhe presion mbi ta dhe kur nuk kishte forcë të gjallë që mund ta largonte BDI-në nga pushteti”, deklaroi Murtezani.
Ai shtoi se koha e sotme kërkon politikë të përgjegjshme, të orientuar drejt integrimit evropian dhe përfaqësimit të dinjitetshëm të shqiptarëve në institucionet e shtetit.
