Presidenti i Ukrainës, Zelensky bën me dije në rrjetet sociale se ka zhvilluar një bisedë telefonike me kryeministrin e Shqipërisë, Edi Rama.
Zelensky u shpreh se falënderoi Ramën për mbështetjen në këto kohë të vështira dhe u zotua se do të bëjë gjithçka për t’i dhënë fund luftës.
“Pata një bisedë telefonike me kryeministri Edi Rama. Folëm për luftën kundër pushtuesit rus. Diskutuam për punën e përbashkët në Kombet e Bashkuara. Vlerësojmë ndihmë praktike dhe mbështetjen e vështirë në këto kohë të vështira. Po bëjmë gjithçka për t’i dhënë fund luftës”, shkruan Zelensky.
Nga ana tjetër kryeministri i Shqipërisë Edi Rama ka shkruar në facebook se presidentit të Ukrainës i ka shprehur vullnetin e plotë për të bërë gjithçka mundemi në përmasën tonë të vogël, që Ukraina të triumfojë në luftën e saj liridashëse.
“Sot pata një telefonatë nga Presidenti Zelensky, i cili më falenderoi për gjithçka Shqipëria po bën në këto ditë tragjike për popullin e tij, për Europën e për mbarë botën, duke nisur nga roli ynë si bashkëpenëmbajtës me SHBA në Këshillin e Sigurimit, tek ndihmat e dhëna për ushtrinë ukrainase, si edhe angazhimi intensiv në kanalet diplomatike me partnerë të rëndësishëm, në mbështetje të Ukrainës. I shpreha presidentit ukrainas të gjithë admirimin dhe solidaritetin e popullit shqiptar në Shqipëri e në Kosovë, me të dhe rezistencën ukrainase, si edhe vullnetin e plotë për të bërë gjithçka mundemi në përmasën tonë të vogël, që Ukraina të triumfojë në luftën e saj liridashëse”, shkruan Rama në FB.
