Vendi do të përfshihet sot nga masa ajrore të ftohta, të cilat do të sjellin vranësira të shumta dhe reshje të herëpashershme shiu në disa rajone. Reshjet më intensive pritet të përqendrohen në juglindje të vendit.
Ulja e temperaturave dhe depërtimi i ajrit të ftohtë nga veriu do të krijojnë kushte që në majat më të larta malore, reshjet e shiut të kalojnë përkohësisht në borë.
Krahas motit të paqëndrueshëm, do të ketë edhe erë nga veriu, me intensitet mesatar deri të fortë. Erërat më të theksuara priten përgjatë luginës së Vardarit, ku herë pas here mund të arrijnë shpejtësi më të larta.
Edhe Shkupi do të karakterizohet nga mot i vranët dhe temperatura më të ulëta. Gjatë ditës nuk përjashtohen reshje të përkohshme shiu, ndërsa era veriore do të jetë e pranishme, me mundësi përforcimi në pjesë të caktuara të luginës.
