Të drejtat e shqiptarëve, zbatimi i Marrëveshjes së Ohrit dhe thellimi i bashkëpunimit mes dy vendeve, prioritetet e mandatit të ri
Ambasadori i Shqipërisë në Maqedoninë e Veriut, Petrit Malaj, ka paraqitur para Komisionit për Evropën dhe Punët e Jashtme objektivat dhe drejtimet kryesore të angazhimit të tij për mandatin e ardhshëm diplomatik.
Gjatë prezantimit, Malaj ka bërë të ditur se veprimtaria e tij do të përqendrohet në një diplomaci aktive dhe të orientuar drejt rezultateve konkrete, duke synuar zhvillimin e mëtejshëm të marrëdhënieve mes Shqipërisë dhe Maqedonisë së Veriut, si dhe garantimin e respektimit të të drejtave të shqiptarëve që jetojnë në këtë shtet.
Një vend të rëndësishëm në prioritetet e tij zë zbatimi i plotë i Marrëveshjes Kornizë të Ohrit, së bashku me respektimin e parimeve dhe standardeve evropiane, të cilat do të shërbejnë si udhërrëfyes për punën e tij diplomatike.
Sipas ambasadorit Malaj, shqiptarët në Maqedoninë e Veriut kanë një rol të veçantë në afrimin e dy shteteve, duke kontribuar në ruajtjen e stabilitetit, forcimin e bashkëjetesës ndëretnike dhe avancimin e proceseve euroatlantike në rajon.
Në një pjesë të mesazhit të tij, diplomati shqiptar ka shprehur edhe vlerësimin e veçantë për Kosovën, me të cilën, siç ka theksuar, e lidhin raporte të rëndësishme profesionale dhe njerëzore.
Ai ka nënvizuar se Kosova do të vazhdojë të ketë një vend të veçantë në jetën e tij, ndërsa lidhjet vëllazërore dhe miqësitë e krijuara ndër vite do të mbeten pjesë e pandashme e rrugëtimit të tij të mëtejshëm diplomatik.
