Punimet në segmentin rrugor Elbasan–Qafë Thanë po ecin me ritme intensive, ndërsa projekti po i afrohet fazës së përfundimit. Lajmin e bëri të ditur kryeministri i Shqipërisë, Edi Rama, përmes një postimi në Facebook.
Sipas Ramës, investimi pritet të sjellë përmirësime të ndjeshme në qarkullimin rrugor, të rrisë nivelin e sigurisë për përdoruesit e rrugës dhe të krijojë kushte më të favorshme për zhvillimin ekonomik dhe turistik të zonës.
Ky aks është pjesë e Korridorit VIII, një prej korridoreve më të rëndësishme të transportit në rajon, ku prej kohësh po zhvillohen punime infrastrukturore. Përfundimi i projektit do të forcojë më tej lidhjen rrugore të Shqipërisë me Republikën e Maqedonisë.
Ndërkohë, në pjesën që shtrihet deri te pika kufitare e Shën Naumit është realizuar një rrugë moderne, e shoqëruar me një shteg të dedikuar për këmbësorë dhe çiklistë. Pranë Tushemishtit, ky shteg ndahet në dy drejtime: njëri vijon përgjatë bregut të liqenit drejt Pogradecit, ndërsa tjetri ndjek një itinerar alternativ që shmang trafikun urban në Pogradec dhe vazhdon në drejtim të Korçës dhe Greqisë, duke e bërë udhëtimin më të shpejtë dhe më të lehtë.
(Struga Ekspres)
