Realizohet marrëveshja e bashkëpunimit për dokumentimin e aktivitetit gjate të luftës
Sot, në ambientet e shoqatës sonë, patëm nderin dhe kënaqësinë të mirëpresim përfaqësuesit e lartë të Institutit për Krimet e Kryera Gjatë Luftës në Kosovë: Drejtorin Ekzekutiv, z. Atdhe Hetemi, udhëheqësen e arkivit, znj. Kimete Haxholli, dhe anëtarin e Institutit, z. Naser Kurti.
Një takim mes memories dhe drejtësisë
Takimi u zhvillua në një atmosferë vëllazërore, ku z. Hetemi prezantoi punën e rëndësishme të Institutit në drejtim të dokumentimit të ngjarjeve të viteve 1998–1999. Nga ana jonë, prezantuam aktivitetin tonë voluminoz gjatë asaj periudhe, jo vetëm në Strugë, por në mbarë Maqedoninë Veriperëndimore.
Gjatë bisedës, theksuam faktin se shoqata jonë, në bashkëpunim me OSCE-në, ka realizuar mbi 300 intervista me viktima dhe dëshmitarë okularë të shkeljes së të drejtave të njeriut. Ky arkiv dëshmon se e vërteta mbetet hapi i parë dhe i pashmangshëm drejt drejtësisë.
Pas diskutimeve konstruktive, nënshkruam një Marrëveshje Bashkëpunimi që do të zhvillohet në dy faza:
Faza e parë: Sistematizimi i plotë i të gjitha dokumenteve që lidhen me Kosovën për periudhën 1990–2000, dekadë në të cilën shoqata jonë ka shërbyer si urë e palëkundur humanizmi.
Faza e dytë: Shoqata jonë do t’i dorëzojë zyrtarisht arkivin e saj në pronësi të Institutit, duke siguruar që këto dëshmi të ruhen në altarin e historisë shtetërore.
Përkushtimi ynë vazhdon
Edhe pas këtij procesi, shoqata jonë do të mbetet e hapur për bashkëpunime që synojnë ruajtjen e kujtesës historike për shoqërinë tonë në Evropën Juglindore. Dokumentimi i të kaluarës është amaneti ynë për brezat që vijnë.
Me respekt,
Jashar Pollozhani
Kryetar i Shoqatës Humanitare Bamirëse “Nëna Terezë” – dega Strugë
