Durmishi: Nga sot puna sezonale rregullohet me ligj
Ministri i Ekonomisë dhe Punës, Besar Durmishi, përmes një postimi në rrjetet sociale ka njoftuar se viti i ri nis me lajme të mira. Ai shkruan se nga sot fillon zbatimi i ligjit që rregullon punën sezonale dhe të përkohshme, me synim formalizimin e tregut të punës dhe uljen e ekonomisë së zezë.
Durmishi thekson se me zgjidhjen e re ligjore, studentët dhe pensionistët mund të angazhohen në punë sezonale dhe të përkohshme në mënyrë të ligjshme, pa humbur të drejtat dhe beneficionet që u takojnë.
Sipas tij, kjo masë synon të krijojë kushte më të qarta për punësim, t’u lehtësojë bizneseve sigurimin e fuqisë punëtore dhe të reduktojë punën në të zezë.
Po ashtu, Durmishi ka njoftuar se nga sot fillon zbatimi i Ligjit për mbështetje financiare të investimeve, me model të ri që synon të stimulojë investimet cilësore, të nxisë hapjen e vendeve të reja të punës dhe të rrisë konkurrueshmërinë e ekonomisë.
“Viti i ri nis me zbatim dhe me rezultate”, ka shkruar Durmishi.
