Nga VMRO-DPMNE-ja thonë se nuk pajtohen me propozimin për orë policore prej 58 orëve gjatë fundjavës së zgjatur.
“Është e palogjikshme të njoftohet se restorantet do të jenë të hapura nga e marta, ndërsa do të jetë e detyrueshme të rrish në shtëpi gjatë gjithë fundjavës së zgjatur. Me fjalë të tjera, e diela dhe e hëna janë të rrezikshme sipas qeverisë së LSDM-së, ndërsa e marta jo ”, thonë nga VMRO-ja.
Nga kjo parti kujtojnë se ata edhe për festën e Pashkëve kishin konsideruar se orari i orës policore ishte shumë i rreptë dhe se tani vlerësojnë sërish të njëjtën gjë për festën e Bajramit. Sipas kësaj partie, në këtë mënyrë po shkelen të drejtat dhe liritë e njeriut.
“Në të njëjtën kohë, me masa të tilla, LSDM-ja me vetëdije hyn në provokimin e tensioneve dhe konflikteve në mes të popullatës dhe ekspozon policinë drejt një situate të padëshirueshme”, theksojnë nga VMRO-DMPNE.
Ndryshe, Komisioni për Sëmundje Infektive deri tek qeveria ka propozuar orë policore prej 58 orëve, respektivisht nga dita e shtunë në ora 19:00 deri ditën e martë në ora 05:00. Të dielën, myslimanët festojnë Fitër Bajramit, që sipas ligjit është festë shtetërore në vendin tonë.
