STRUGA, QYTETI I DRITËS, NDEROJË GONXHE BOJAXHIUN, NËNËS TEREZËN…
Në ditët kushtuar Nënës Terezë, Struga u shndërrua në një vatër shpirtërore e kulturore, ku u promovuan tri libra që bartin në vete trashëgiminë e pavdekshme të Gonxhe Bojaxhiut, bijës së Shkupit që u bë shenjtorja e njerëzimit. Manifestimi nisi me një gjest domethënës dhe të përjetshëm: vendosjen e luleve të freskëta para shtatores së Nënës Terezë në sheshin e Strugës, si simbol i nderimit dhe mirënjohjes sonë të përbashkët. Ky akt solemn u pasua nga një ngjarje kulturore, që mblodhi intelektualë, krijues dhe figura të sakrificës për çështjen kombëtare, duke dëshmuar se kujtesa jonë nuk shuhet, por ndriçon sa herë që prekim rrënjët e shpirtit kombëtar. Me librin “Gonxhja e Shkupit në Kurorën e Botës” u dëshmua lidhja e saj e thellë me identitetin tonë historik: “Me bashkudhëtarët e Nënës Terezë – nga misioni në shenjtëri” u prek dimensioni i saj njerëzor dhe i përditshëm. Ndërsa me “Porositë e Shën Nënë Terezës për ne”, u ofrua udhërrëfyesi moral që tejkalon kohët. Këto botime nuk janë vetëm libra, por gurë kujtese e fryme, që na rikujtojnë se dashuria, falja dhe përulësia janë themelet mbi të cilat ndërtohet një komb i drejtë dhe i fortë. Një falënderim i veçantë nga autorët i shkojë Shoqatës “Nëna Terezë” në Strugë me Kryetar intelektualin atdhetar Jashar Pollozhani, Teatrit “Poshka”, Konsulit të Konsulatës Shqiptare në Strugë zotit Petrit Musa dhe personaliteteve tjera të shquara nga Struga. Të cilët u kujdesën për mikëpritjen e autorëve të veprës, me në krye Don Lush Gjergjin, Prof Dr Skender Asani, Don Fatmir Koliqi në cilësin e Shtëpisë Botuese Drita dhe redaktorit të veprave , publicistit të njohur Emin Azemi. Ngjarje të cilën e ngritën mbi kufijtë e të zakonshmes, duke e kthyer në një amanet të gjallë për të gjithë ne: që jeta dhe vepra e Nënës Terezë të mos mbeten vetëm në kujtesë, por të bëhen përvojë e përditshme e shpirtit tonë kombëtar!
