Me vetëm një votë kundër, 607 delegatë zgjodhën Ziadin Selën për kryetar të Aleancës për Shqiptarët në kongresin e parë të kësaj partie që u mbajt sot në qendrën për kulturë në Tetovë.
Para zgjedhjes së kryetarit, delegatët miratuan edhe statutin dhe platformën e partisë. Në statutin e ri të partisë Sela tha se janë vendosur risi të cilat nuk janë praktikuar deri më tani nga subjektet e tjera politike siç janë lejimi i fraksioneve, kufizimi i mandatit të kryetarëve të partisë dhe strukturave, si dhe përfshirja e diasporës shqiptare në të gjitha organet e partisë.
Në fjalimin e tij para delegatëve menjëherë pas zgjedhjes në krye të Aleancës, Sela i dërgoi porosi kryeministrit Zoran Zaev duke rikujtuar atë në parimet e para të cilat ishin vedosur gjatë koalicionimit dhe që sipas Selës, janë shkelur pas formimit të Qeverisë. Sela akuzoi Zaevin se mbron gjykatësit e korruptuar, nuk sjell drejtësinë e premtuar për shqiptarët dhe i bëri thirje që të mos ndërhyjë në verdiktin e shqiptarëve sikur në zgjedhjet e fundit lokale.
Në Kongresin e sotëm morrën pjesë edhe 20 delegatë nga diaspora e shqiptarëve të Maqedonisë. Ndërkaq propozimet e reja për ndryshim të statutit që u prezentuan në kongres u vendos që t’i përcillen Kuvendit qëndror në formë të shkruar dhe të njëjtat të shqyrtohen edhe nga komisioni juridiko-statutor.
