Adem Gashi bëri bujë në Australi me veprimin e tij, ku pasi gjeti në tren një çantë me 6250 dollarë vendosi t’ia kthejë ato pronares
Ai foli mëngjesin e sotëm në një lidhje direkte në “Wake Up”, duke rrëfyer se për asnjë moment nuk mendoi të bënte të kundërtën.
“Zonja u ul pranë meje në tren, ndërsa nuk qëndroi aty më shumë se 1 minutë dhe u ngrit sërish. Sapo ajo doli unë pashë çantën dhe u mundova të trokisja në dritare dhe t’ia jepja atë, por treni u nis dhe nuk munda. Më pas zbrita pas 3 stacionesh. Kërkova për ndonjë kontakt në çantë, por nuk gjeta gjë, vetëm disa çelësa makine. Ndërsa, gjeta dhe një çantë të vogël me para. Për asnjë moment nuk kam menduar që t’i mbaja paratë. Përkundrazi, kur pashë çelësat e saj më erdhi shumë keq, pasi kjo gjë më ka ndodhur edhe mua. Pasi dola nga treni, kontaktova një televizion dhe me ndihmën e tyre gjeta zonjën. Nuk njoftova policinë pasi doja t’ia jepja vetë paratë zonjës. Ishte një ndjesi mjaft e bukur kur arrita ta gjej dhe t’ia dorëzoj çantën”, shprehet Adem Gashi në “Wake Up”.
Më tej, ai tregon se ka 13 vjet që jeton dhe punon në Australi.
