Policëve rezervë në Maqedoni u është dërguar ftesë për mobilizim, është lajmi bombë i plasuar nga disa portale maqedonase.
Mirëpo nga Ministria e punëve të brendshme thonë se bëhet fjalë për stërvitje të rregullta vjeshtore të përbërjes rezervë. Disa prej tyre kanë publikuar ftesën për mobilizim në rrjetet sociale.
“Bëhet fjalë për stërvitje të rregullt vjetore, gjuajtje vjeshtore. Kjo stërvitje mbahet dy herë brenda vitit dhe ka qëllimin e vetëm për mbajtje në kondicion të përbërjes rezervë. Kjo nuk ka kurrfarë lidhje me protestat, por është pjesë e MPB-së. Në kazermën Gjorçe Petrov janë ftuar rezervistë në nivel të SPB-së së Shkupit, ka deklaruar zëdhënësi i policisë Toni Angelovski, transmeton Gazeta Lajm.
Portale opozitare kanë shkruar se termini i zgjedhur për këtë stërvitje (18 nëntori e diel) ka frikuar qytetarët se policia po bëhet gati të përplaset me protestuesit.
