Departamenti për kontroll të brendshëm, hetime kriminalistike dhe standarde profesionale pranë MPB-së, deri tek Prokuroria e Koçanit ka ngritur padi penale kunëdr personit Z.S, i punësuar si inspektor në Zyrën e jashtme për punë kriminalistike në Koçan.
Padia është ngritur për shkak të ekzistimit të dyshimeve se ka kryer veprën “keqpërdorim të detyrës zyrtare”, njofton Telegrafi Maqedoni.
“I padituri duke mos ndërmarrë veprimet ligjore ka lejuar që të vjetërohen kallëzimet penale, me çka ka shkaktuar dëm tek qytetarët në vlerë prej 409 mijë denarë”, thonë nga policia.
Ata shtojnë se ndaj të paditurit gjithashtu është ngritur edhe procedurë për masë disiplinore dhe i njëjti do të suspendohet nga puna deri në mbarimin e procedurës.
