Çdo verë, Struga merr një frymë tjetër. Nuk janë vetëm rrugët që mbushen, por edhe shtëpitë, bizneset dhe kujtimet. Mërgimtarët nuk vijnë si mysafirë, ata kthehen në shtëpinë e tyre. Për vite me radhë kanë mbajtur lidhjen me vendlindjen, kanë ndihmuar familjet e tyre dhe kanë kontribuar në ekonominë e qytetit.
Prandaj besoj se duhet t’i presim me lule, jo domosdoshmërisht në kuptimin e mirëfilltë, por me respekt, mirësjellje dhe mirënjohje.
Ata gjallërojnë Strugën, mbështesin bizneset lokale dhe i japin qytetit një atmosferë që gjatë pjesës tjetër të vitit shpesh mungon.
Sigurisht, edhe mërgimtarët, si çdo qytetar, duhet të respektojnë rregullat dhe komunitetin. Respekti duhet të jetë i ndërsjellë. Por nuk duhet të harrojmë se ata janë pjesë e pandashme e Strugës.
Një qytet që di t’i mirëpresë njerëzit e vet tregon kulturë dhe pjekuri. Rrënjët dhe përkatësia nuk zbehen me distancën, por forcohen me dashurinë për vendlindjen.
Lindim Etemi (Struga Ekspres)
