Shqiprim Arifi i Alternativës për Ndryshim (APN) në Preshevë është një nga kandidatët e vetëm për kreun e një komune në Ballkan që ofron nënshkrimin e një kontrate me qytetarin, për të realizuar premtimet e tij.
Ai ditëve të fundit është në çdo cep të Preshevës, ku firmos kontratën e tij me qytetarët. Në këtë kontratë janë 30 zotimet e partisë së tij APN, që do të realizohen gjatë mandatit katër vjeçar të qeverisjes në Preshevë.
“Qëllimi i këtij aktiviteti është që të jemi transparent me ofertën tonë karshi qytetarëve. Ne po i ofrojmë kontratën tonë që përmban 30 zotime që duhet të realizohen. Ky është aktivitet që e kemi nisur dhe vazhdon deri në fund të fushatës. Me këtë jemi më transparent me qytetarët dhe më të qartë. Interesimi është i madh, pasi që qytetarët për herë të parë njihen në mënyrë transparente me ofertën e një partie serioze”, theksoi për INA, Shqiprim Arifi.
Sipas tij, kjo ofertë do të dal sfiduese dhe do të sigurojë një fitore të thellë në zgjedhjet e 24 dhjetorit. Ndër zotimet kryesore janë hapja e kufirit Miratoc – Llojan, tekstet shkollore si dhe investimet në sferën e arsimit dhe sfera të tjera, por edhe tërheqja e investitorëve të huaj.
