Ministri i Punëve të Brendshme të Kosovës, Ekrem Mustafa dhe homologu i tij nga Shkupi, Oliver Spasovski sot firmosën marrëveshjen për nohjen reciproke të patentë – shoferëve, informon INA.
Gjatë takimit të tyre në Prishtinë u diskutua për bashkëpunimin ndërkufitar ndërmjet dy institucioneve në luftën kundër krimit të organizuar, terrorizmit dhe veçanërisht u diskutua për Protokollin ndërmjet dy vendeve për kryerje të kontrollit kufitar në trafikun hekurudhor (Hani i Elezit/Bllacë).
“Ka disa segmente ku ministritë tona të brendshme mund të bëjnë më shumë për qytetarët tanë, pikërisht me anë të marrëveshjeve dhe memorandumeve, si ato që i nënshkruam sot”, tha ministri Mustafa.
Ndërsa ministri i Punëve të Brendshme, Oliver Spasovski tha se ky është një akt shumë i rëndësishëm, nga i cili dobi më të madhe do të kenë qytetarët e dy shteteve.
“Ky proces ka filluar shumë kohë përpara dhe do të vazhdojë me kapitull të ri. Është një akt që do t’iu sjellë lehtësira më të mëdha qytetarëve e të dy shteteve. Gjatë realizimit të kësaj të drejte besojmë që ky hap do të përmirësojë bashkëpunimin ndërmjet dy shteteve tona”, tha ministri Spasovski.
