Presidenti i Republikës Ilir Meta dhe ambasadorja Yuri Kim janë përfshirë në një debat të fortë në distancë mes tyre.
I ftuar në një emision televiziv, kreu i shtetit bëri të ditur se ambasadorja Yuri Kim i kishte nisur një mesazh ku i kërkonte që në deklaratat e tij të mos përmënde më fjalën sfurk.
“Tani live sapo me shkruajti ambasadorja Yuri Kim per te mos permendur me sfurqet. I them ambasadores amerikane live që të mos marrë më në mbrojtje Edi Ramën”.
Pas kësaj deklarate, diplomatja amerikane e bëri publik qëndrimin e saj me anë të një mesazhi në Twitter.
“Është e papranueshme për këdo që të kërcënojë se qytetarët do të marrin “sfurqet” në 25 Prill ose nëse nuk u pëlqen rezultati i zgjedhjeve. Këto kërcënime meritojnë dënim. Ata që nxisin dhunë do të mbajnë përgjegjësi për rezultatet e fjalëve dhe veprimeve të tyre. Ndal”.
Me publikimin e këtij mesazhi kreu i shtetit bëri akuza të forta ndaj ambasadores duke i kërkuar të mos mbrojë Kryeministrin Rama.
“Meqë jam transparent po ju them edhe një fakt që ambasadorja amerikane më ka kërkuar mua si President, një ditë para mbledhjes së KED-së të pranoj unë Ardian Dvorani. Këtë ajo e kërkoi jo në emër të Amerikës, po në emër të Edi Ramës”.
Meta shkoi edhe më tej kur tha se e di që Shtetet e Bashkuara edhe mund ta vrasin nëse dëshirojnë.
“Të më çojnë te Mali me Gropa”.
Presidenti e ftoi ambasadoren që së bashku me Kryeministrin Rama të ballafaqohen me të në një debat.
Tv Klan
