Kroacia është në gjendje ankthi dhe e gjithë vëmendja është përqendruar në Moskë, ku kombëtarja kroate do të takohet me Francën, në finalen e Kupës së Botës.
Trajneri Zlatko Daliç është shprehur i emocionuar para kësaj ndeshjeje, por edhe optimist.
“Në finale hyjmë si në luftë, për ta lënë kokën aty, të shohim çfarë do të ndodhë. Nëse e fitojmë trofeun, askush nuk do të jetë më krenarë se ne, nëse jo, do ta urojmë rivalin dhe shkojmë tutje. Ky është sporti. Nuk na intereson kush është në finale. Ne do të kënaqemi në këtë ndeshje dhe do të japim maksimumin. Ky është një moment që e kemi merituar. Le të na shikojë e gjithë bota dhe pjesa më e madhe le të jetë me ne. Në karrierë nuk ka ditë më të madhe se ndeshja e nesërme dhe pa marrë parasysh si do të përfundojë, ne do të jemi krenarë. A do të ‘eksplodojë’ Kroacia të dielën? Sigurisht do të ketë dridhje toke. Pikërisht tifozët tanë janë motivi ynë më i madh. Jemi të kënaqur që popullin kroat e kemi bërë të lumtur. Këto 25 ditë kroatët kanë jetuar të lumtur. Nëse e fitojmë titullin, për nga mënyra e festimit do ta mposhtim edhe Brazilin dhe Argjentinën”, është shprehur Daliç.
