Një prift nga Manastiri ka refuzuar tia kryejë ceremonitë e varrimit një të vdekuri, vetëm pse ishte babai i ish-deputetit dhe anëtarit të LSDM, Vasko Kovaçevski, informon INA duke u thirrur në shkrime të portaleve maqedonase.
Ish-deputeti menjëherë pas vdekjes së babait është drejtuar tek prifti Stefan, i njohur për qëndrimet dhe pjesëmarrjen në protestat kundër ndryshimit të emrit në Manastir dhe qytete tjera.
Ish-deputeti Kovaçevski ka informuar priftin për vdekjen e babait dhe e ka ftuar për tia kryer ceremoninë e varrimit, por përgjigja e priftit Stefan ka qenë refuzuese.
“Zoti ta fal babain tuaj dhe i qoftë dheu i lehtë, por unë jam betuar se nuk i këndoj dhe nuk i shërbej tradhëtarëve”, ka thënë kleriku, transmeton portali maqedonas infomax. Pas kësaj ka pasur presione ndaj klerikut, mirëpo ai thuhet më tej se nuk ka pranuar asgjë.
Vasko Kovaçevski ka qenë ish-deputet i LSDM, ndërsa tani është drejtor i Termocentralit “REK-Manastiri”.
