Në mbledhjen e sotme, Këshilli Gjyqësor vendosi që gjyqtari Zoran Gerasimovski të emërohet ushtrues i detyrës së kryetarit të Gjykatës së Apelit në Shkup. Ky vendim vjen pas zgjedhjes së ish-kryetares së kësaj gjykate, Meri Dika, si gjyqtare e Gjykatës Kushtetuese. Për këtë pozitë ishin paraqitur dy kandidatura, ajo e Tanja Milevës dhe e Zoran Gerasimovskit, ndërsa anëtarët e Këshillit vendosën që detyrën e përkohshme ta ushtrojë Gerasimovski. Në të njëjtën seancë u vendos edhe shpallja e konkursit për zgjedhjen e kryetarit të ri të Gjykatës së Apelit në Shkup.
Këshilli Gjyqësor mori gjithashtu vendim për ndërprerjen e përkohshme të funksionit gjyqësor të Meri Dikës, pas emërimit të saj në Gjykatën Kushtetuese. Gjatë seancës u shqyrtua edhe kërkesa e gjyqtarit të Gjykatës Themelore në Ohër, Vullnet Vinca, për të vazhduar punën si gjyqtar edhe pas përmbushjes së kushteve për pension. Kërkesa e tij nuk u pranua, pasi nuk ishte respektuar afati ligjor për dorëzimin e deklaratës së kërkuar.
Në të njëjtën kohë, Këshilli konstatoi se Vinca ka përmbushur kushtet për pension pleqërie. Meqenëse ai ka qenë edhe kryetar i Gjykatës Themelore në Strugë, u paraqit nevoja për caktimin e një ushtruesi të detyrës për këtë gjykatë. Për këtë funksion ishin propozuar Tançe Petreski, Nderim Polisi dhe Sonja Gjonçeska, ndërsa Këshilli vendosi që detyrën ta marrë përsipër Nderim Polisi. Po ashtu, u shpall konkursi për zgjedhjen e kryetarit të ri të Gjykatës Themelore në Strugë.
Gjatë seancës, Këshilli Gjyqësor konstatoi edhe se gjyqtarja e Gjykatës së Apelit në Manastir, Tatjana Susulevska, ka plotësuar kushtet për pension pleqërie. Në përfundim të punimeve u krijuan komisione të posaçme për shqyrtimin dhe vlerësimin e procedurave për zgjedhjen e kryetarëve të Gjykatës së Apelit në Shkup dhe Gjykatës Themelore në Strugë.
(Struga Ekspres)
