Sot u vërtetua se drejtorët e shkollave në Strugë janë jolegjitimë 📢
Tre muaj më parë paralajmëruam publikisht se proceset në arsim në Strugë po devijojnë nga baza ligjore. Sot, kjo është vërtetuar edhe institucionalisht.
Ka arritur vendimi i Komisionit të shkallës së dytë, përmes të cilit anulohen vendimet për shkarkimin e drejtoreshës së mëparshme të SHMK “Ibrahim Temo”. Sipas informatave tona, pritet që edhe rastet e tjera të drejtorëve paraprak të marrin epilog të njëjtë juridik.
Kjo nënkupton se emërimet e bëra në shkollat fillore dhe të mesme në Strugë janë realizuar në kundërshtim me procedurat ligjore, duke e bërë legjitimitetin e ushtruesve aktualë të detyrës seriozisht të kontestueshëm.
Përgjegjësia juridike tashmë nuk mbetet vetëm politike, por bie drejtpërdrejt edhe mbi kryetarin e komunës dhe personat e emëruar në mënyrë të kundërligjshme.
Ky zhvillim konfirmon edhe një herë qëndrimin tonë të qartë dhe të pandryshueshëm: politika duhet t’i mbajë duart larg arsimit.
Sipas informatave relevante, për këto procedura tashmë janë duke u mbledhur informacione edhe nga institucionet e drejtësisë, ndërsa Inspektorati Arsimor në Strugë ka dërguar shkresë zyrtare deri te Prokuroria kompetente, ku janë evidentuar veprimet kontestuese dhe është kërkuar informacion plotësues për thellimin e hetimeve.
Në muajt në vijim, pas përfundimit të mandatit 6-mujor të ushtruesve të detyrës, mbetet të shihet se çfarë procedurash të reja do të ndjekë kryetari Qyra, sidomos duke pasur parasysh faktin se shumica e të emëruarve nuk kanë kaluar provimet për licencim si drejtorë.
Në drejtësi ekziston një parim i qartë: gabimi mund të ndodhë nga mosdija, por përsëritja e tij në rrethana kur ligji dhe argumentet janë të qarta, përbën veprim me vetëdije të plotë dhe përgjegjësi të drejtpërdrejtë.
Duhet rikujtuar se edhe ish-kryetari i Komunës së Strugës është dënuar për shkelje të ngjashme ligjore në fushën e arsimit, gjë që e bën edhe më të rëndë peshën e këtyre veprimeve dhe përgjegjësinë institucionale që duhet të mbahet.
BDI Strugë do ta ndjekë nga afër këtë proces, duke mbetur e palëkundur në mbrojtje të ligjshmërisë, transparencës dhe integritetit të sistemit arsimor.
BDI-Strugë
