Ministria e Punëve të Brendshme bëri të ditur se një grua 82-vjeçare nga Shkupi është mashtruar nga një person që u prezantua si punonjës policie, duke i marrë rreth 170.000 denarë.
Sipas denoncimit, mashtruesi e kontaktoi të moshuarën përmes telefonit dhe i tha se mbesa e saj kishte shkaktuar një aksident trafiku me pasojë vdekjen e një fëmije, duke kërkuar para për të shmangur arrestimin e saj.
E bindur nga historia, viktima doli në rrugë dhe ia dorëzoi shumën një personi të panjohur. Më vonë ajo kuptoi se mbesa e saj nuk ishte përfshirë në asnjë aksident dhe se kishte rënë pre e mashtrimit.
MPB theksoi se po ndërmerren masa për zbardhjen e plotë të rastit.
