Kombëtarja Shqiptare është rrugës për në Amerikë
Shqipëria ka shkruar një kapitull të ri në historinë e futbollit kombëtar, duke siguruar kualifikimin në fazën playoff të Botërorit 2026 pas një fitoreje të rëndësishme 0–1 në fushën e Andorrës. Ishte një ndeshje që duhej domosdoshmërisht fituar — dhe kuqezinjtë ia dolën me vendosmëri, qetësi dhe personalitet.
Golin vendimtar e realizoi Kristjan Asllani në minutën e 67-të, pas një aksioni të ndërtuar me durim e saktësi. Pas një kombinimi të bukur, Myrto Uzuni dha asistin perfekt, ndërsa Asllani shënoi me një goditje të saktë brenda zonës, duke vulosur fitoren e madhe.
Skuadra e Sylvinhos dominoi sfidën nga fillimi në fund, mbajti kontrollin e lojës dhe nuk i dha asnjë hapësirë surprizave nga kundërshtari. Me disiplinë, përkushtim dhe shpirt gare, kuqezinjtë treguan se janë një ekip i pjekur dhe plot besim.
Falë këtij rezultati, Shqipëria siguron matematikisht pjesëmarrjen në playoff, duke u renditur mes ekipeve që do të garojnë për një vend historik në Kampionatin Botëror 2026.
Një sukses i jashtëzakonshëm, plot emocione dhe krenari, që shpërthen në zemrën e çdo shqiptari dashamirës të futbollit.
(Struga Ekspres)
