Me rastin e 24-vjetorit të Marrëveshjes së Ohrit, kreu i BDI-së, Ali Ahmeti, theksoi angazhimin e shqiptarëve për një Maqedoni unitare, të përbashkët dhe të barabartë.
“Unë dhe shqiptarët, dje, sot dhe nesër, angazhohemi për një Maqedoni unitare — as timen përsëri, as tuajën përsëri, por gjithmonë Maqedoninë tonë,” shkroi Ahmeti në kolumnën për “360 gradë”.
Ai kujtoi se Marrëveshja e Ohrit shënoi fillimin e ndërtimit të një shteti të përbashkët dhe euroatlantik, duke shtuar se “me këtë marrëveshje shtrënguam duart dhe i dhamë fjalën për një atdhe të barabartë”.
Ahmeti theksoi gjithashtu se shqiptarët nuk e kanë kontestuar kurrë identitetin, gjuhën dhe historinë maqedonase dhe se “sot, 24 vjet pas Marrëveshjes, Maqedonia ekziston dhe është anëtare e NATO-s”.
Në fund, ai u bëri thirrje qytetarëve për bashkëpunim dhe respekt të ndërsjellë, duke theksuar se vetëm kështu mund të ndërtohet një shoqëri e drejtë dhe e barabartë, që do të mbrojë vlerat evropiane.
