Struga po përpiqet të zgjidhë problemin e personave që shtrojnë dorën për lëmoshë…
Shqetësues është se një numër në rritje i fëmijëve po lypin rrugëve të Strugës. Qendra për Çështje Sociale ka përgatitur një protokoll të posaçëm dhe grup pune me përfaqësues nga të gjitha institucionet për të ndalur abuzimin ndaj të miturve. Po kryhen aksione të intensifikuara në terren, po punohet për forcimin e prindërimit të përgjegjshëm në mënyrë që fëmijët të kthehen në shtëpi dhe në shkolla.
“Problemi social i lypjes në komunën e Strugës po thellohet çdo vit. Është karakteristik se të gjithë fëmijët që kërkojnë lëmoshë janë nga komunat e tjera. Nuk kemi asnjë fëmijë nga komuna e Strugës dhe as komuna e Vevçanit.”, tha Mevmed Halili, drejtor i Qendrës për Çështje Sociale Strugë.
Krahas gjobave, hapi i fundit për prindërit e pakujdesshëm që i lënë fëmijët të lypin në rrugë është edhe heqja e të drejtës prindërore.
“Mekanizmi më i mirë për t’u kujdesur për fëmijët e rrugës është nëpërmjet vendosjes në familje kujdestare dhe një shtëpi të vogël grupore për fëmijët në rrezik përmes kujdesit të përditshëm të fëmijëve të rrugës. Përdorimi i instrumentit të monitorimit të ushtrimit të së drejtës prindërore, ku përfshihet edhe masa e heqjes së të drejtës prindërore.”, tha Halili.
Problemi i personave që kërkojnë lëmoshë në Strugë ka vite që kalon nëpër institucione, për shkak të mungesës së hapësirës për të akomoduar lypsarët, të cilët pas shumë aksioneve kthehen në rrugë. Hulumtimi i Shoqatës “Ndërtojmë të Ardhmen” vitin e kaluar ka treguar se 4000 fëmijë në vend lypin nën qiell të hapur, kurse 18700 nuk janë në bankat e shkollës.
