2021
Dje u raportua për vdekjen aksidentale të një të riu në Rugovë. Egzon Ademi, 33-vjeçar, humbi jetën pasi rrëshqiti nga një lartësi dhe ra në lum.Lidhur me vdekjen e të riut ka shkruar edhe motra e tij e cila jeton në Zvicër.
Ajo tha se lajmi për vdekjen e vëllait e ka goditur si rrufe. Në mesin e fjalëve emocionuese që ka shkruar, ajo ka përmendur edhe këngët që po përgatiste për dasmën e vëllait të saj, tashmë të ndjerë.
“Lajmi i zi – thonë – mbërrin shpejt, në të gjitha anët e Horizontit. Ndërsa dje, nga një Maje e Bjeshkëve të Nemuna, më kishte zgjedhur Zoti mua për të më sjellë një lajm të rëndë, për të më sjellë një gjëmë shpirti, një çarje zemre, një mal me dhimbje që s’mbahen dot; për të më sjellë në anë të botës një lajm të trishtë, një lajm të zi… Paske qenë ti o im vëlla në kryetitujt dhe kryelajmet që u shpërhapen si re të zeza- nëpër të gjitha horizontet, derisa erdhe më gjetën mua: më gjetën mua në anë të botës dhe më goditen si rrufe… Paske qenë ti o vëlla i motrës, që më solle lajmin e zi, e unë e shkreta po thurja vargje që t’i bëj këngë për dasmën tënde. Vëlla i motrës vëlla…Zoti të bëftë pëllumb parajse dhe na takoftë atje bashkë, o i bukur im… o vëlla i motrës vëlla…Paske qenë ti o im vëlla! Lajmi i zi”, ka shkruar ajo.
