Pa organizimin e një vetingu të mirëfilltë, Republika e Maqedonisë së Veriut përsëri do të hasë në zvarritje dhe pengesa drejt përshpejtimit të rrugës për anëtarësim në Bashkimin Evropian. Kështu është shprehur kryetari i BDI-së, Ali Ahmeti në emisionin Balkan Talks në Euronews Albania me gazetarin Franko Egro.
“Nëse ne jemi të përkushtuar të bëjmë këtë veting, të ngrisim një institucion të mirëfilltë dhe të besueshëm për opinionin me qëllim që të rregullohet çështjet e gjyqësisë, të futen në një filtër të gjithë politikanët dhe jo për hakmarrje e as me mjete radikale por le të dihet, psh Franko Egro ka hyrë në politikë, ka pasur një shtëpi, tani pas 10 viteve Franko Egro ka bërë 10 shtëpi! Si i ka bërë këto Franko, le të dihet le të jetë gjithçka transparente sepse vetëm kështu i jepet fund lajmeve të rrejshme, thashethemeve pasi që ka shumë gjëra që shpifen për të luftuar kundërshtarin dhe nëse kalon nëpër këto filtra u ngushtohet hapësira edhe lajmeve të rrejshme edhe denigrimeve, edhe fyerjeve por edhe hatër mbetjeve si edhe luftës mes partive politike”, u shpreh Ahmeti.