Nga 1 nëntori ndryshon mënyra e vlerësimit në provimin DTZ. Për rezultatin B1 do të kërkohet një nivel minimal në secilën pjesë të testit.
Gjermania ka miratuar kërkesa më të rrepta për kalimin e testit të gjermanishtes për emigrantët, “Deutsch-Test für Zuwanderer” (DTZ). Ndryshimi i rregullores u publikua më 20 tetor 2026 dhe hyn në fuqi më 1 nëntor.
Rregullat e reja prekin mënyrën se si kombinohen rezultatet e pjesëve të provimit për të marrë vlerësimin përfundimtar B1.
Kandidatët duhet të arrijnë nivelin B1 në të folur dhe në të paktën njërën prej dy pjesëve të tjera: “Dëgjim/Lexim” ose “Shkrim”. Në pjesën e mbetur do të kërkohet së paku niveli A2.Kjo do të thotë se, nëse një kandidat arrin B1 në të folur dhe në “Dëgjim/Lexim”, ai duhet të marrë të paktën A2 edhe në shkrim. Nëse arrin B1 në të folur dhe në shkrim, atëherë duhet të sigurojë së paku A2 në “Dëgjim/Lexim”.
Deri tani, për rezultatin përfundimtar B1 mjaftonte ky nivel në të folur dhe në njërën prej dy pjesëve të tjera, pa një kërkesë minimale A2 në pjesën e mbetur.
Sipas Ministrisë së Brendshme gjermane, ndryshimi synon të pengojë mashtrimet në provime. Ishin evidentuar raste kur përdoreshin zgjidhje të blera në internet për pjesën “Dëgjim/Lexim”, ndërsa pjesa e shkrimit lihej bosh.
Rregullat e reja kanë rëndësi edhe për shqiptarët që ndjekin kurset e integrimit ose përgatiten për DTZ në Gjermani. Veçanërisht të interesuar janë kandidatët që synojnë ta përdorin certifikatën si dëshmi të njohurive gjuhësore në procedurat e qëndrimit apo të shtetësisë.
Ndryshimi ka të bëjë me kriteret e vlerësimit të DTZ-së. Ai nuk nënkupton kalim të kërkesës së përgjithshme nga niveli B1 në B2.
