Shkollat në fshatrat shqiptare Bogovicë, Pohum dhe Zhepin janë të mbyllura nga sot, pas vendimit të marrë një ditë më parë në Këshillin e Komunës së Strugës.
Vendimi për mbylljen e shkollave u miratua me votat e 12 këshilltarëve, duke shkaktuar reagime dhe shqetësim te banorët e këtyre tre fshatrave.
Mbyllja e institucioneve arsimore prek drejtpërdrejt nxënësit dhe familjet e komuniteteve lokale, ndërsa vendimi ngre pikëpyetje mbi të ardhmen e këtyre fshatrave dhe zhvillimin e tyre.
Me mbylljen e shkollave, banorët përballen me një realitet të ri, ku fëmijët do të duhet të ndjekin mësimin jashtë vendbanimeve të tyre.
Vendimi ka hapur debat edhe për përgjegjësinë e institucioneve lokale dhe të këshilltarëve që votuan pro mbylljes.
Një shkollë më pak në një fshat nuk është vetëm mbyllja e një objekti arsimor. Për shumë banorë, ajo shihet si një tjetër hap drejt zbrazjes dhe shuarjes së jetës në këto vendbanime.
Banorët kërkojnë përgjigje se pse u mor ky vendim dhe çfarë do të ndodhë me nxënësit, mësuesit dhe objektet shkollore të këtyre tre fshatrave.
(Struga Ekspres)
