Mexhiti: Një sihariq i mirë nga Kosova, fitore e re për Albin Kurtin dhe Vetëvendosjen
Nënkryetari i BDI-së, Izet Mexhiti, ka përshëndetur fitoren e re të kryeministrit të Kosovës, Albin Kurti, dhe të Lëvizjes Vetëvendosje, duke e cilësuar atë si një lajm të mirë që vjen nga Kosova.
Në mesazhin e tij të urimit, Mexhiti thekson se fitorja e Kurtit është edhe më e madhe se ajo e zgjedhjeve të kaluara, ndërsa zgjedhjet demokratike të zhvilluara sot, sipas tij, e rikonfirmojnë se Kosova ka ndërtuar një traditë të mirëfilltë demokratike me garë të ndershme dhe të drejtë.
“Është kënaqësi e madhe të shoh fitoren tuaj të re. Zgjedhjet demokratike dëshmojnë se Kosova tashmë ka krijuar një traditë të fortë demokratike”, ka deklaruar Mexhiti.
Ai ka përmbyllur urimin me fjalët: “Nga Shkupi i fitoreve, përgëzime për rezultatin tuaj!”, duke i uruar suksese të mëtejshme kryeministrit Kurti dhe qeverisë së re të Kosovës.
(Struga Ekspres)
